LAOAG CITY – Balligi a naisayangkat ti maibilang a kadakkelan a coastal clean-up coalition iti Northern Luzon para iti Waste-Free Future iti Barangay 35 Gabu Sur ditoy siudad ti Laoag.
Daytoy ket kagiddan iti pannakaselebrar ti International Clean-up Day ita nga aldaw, Setiembre 19.
Segun ken ni Mrs. Mylene Pascual, mangidadaulo ti City Environment and Natural Resources Office ditoy siudad ti Laoag, umabot iti agarup uppat a ribu nga indibidual ti nakipaset iti naindaklan ken naisangsangayan nga aktibidad manipud kadagiti nagduduma nga ahensia ti gobierno, pagadalan, dakkel a mall, barangay officials ken dagiti non-government organization kas ti City Government of Laoag, Department of Trade and Industry, Department of Social Welfare and Development, Mariano Marcos State University, Northwestern University, Mariano Marcos Memorial Hospital and Medical Center, Philippine Red Cross, Ilocos Norte Police Provincial Office pakairamanan ti sumagmamano a kameng ti media kas ti Bombo Radyo Laoag.
Inbatadna nga apaman a nalpas a nagpidot ti basura dagiti nakipaset iti aktibidad ket naiget a naipatungpal ti No segregation, No collection policy no sadinno a naisayangkat ti waste segregation.
Inlawlawagna a napateg daytoy nga addang tapno ad-adda a maipasigurado ti pannakatagiben iti aglawlaw ken kabaybayan babaen ti panagbibinnulig ti tunggal maysa nga umili.
Kabayatanna, bayat a maisursurat daytoy a damag ket manarimaan pay laeng ti pannakai-kilo dagiti basura manipud iti residual, recyclable ken non-recyclable.
