LAOAG CITY – Inaprubaranen ti Senado ti Senate Bill No. 1819 wenno Sagip Bata Act a mangipaay ti proteksiyon iti ubing a Pilipino kontra iti sexual violence, coercion, extortion, trafficking ken exploitation iti internet.
Iti manipestasyon ni Senador Risa Hontiveros iti deliberasyon ti gakat, inbatad na a kasapulan a suportaran ti Kongreso ti gakat no bilang mapagbalin a linteg iti babaen ti panangilatang ti pondo.
Mainaig iti daytoy, nagbotos met pabor da Senador Francis “Kiko” Pangilinan ken senador Bam Aquino iti pannakapagbalin a linteg ti Sagip Bata Act, a gagem na nga isalakan dagiti ubbing Pilipino manipod iti sexual violence, coercion, extortion, trafficking ken exploitation iti internet.
Inlawlawag ni Pangilinan a basar iti UNICEF-Harm study, maysa iti kada lima a Pilipino nga agus-usar ti internet, manipod iti agtawen ti 12 agingga iti 17, mapatta-patta a dua a milyon nga ubbing ti nakapasaren ti nakaro a klase ti online sexual abuse wenno exploitation.
Karaman kadagitoy ket ti sexual blackmail, non-consensual sharing ti sexual images, ken coercion iti babaen ti kwarta, regalo wenno kari.
