LAOAG CITY – Naliwliwa dagiti netizens iti kapadasan ti motorista a ni Bambit Kapauan Gaerlan kalpasan a madistorbar daytoy bayat nga agmanmaneho tapno itulod ti asawana iti trabaho gapu iti maysa nga aso a matmaturog iti tengnga ti kalsada iti Bgy. Ula, Davao City.
Makita iti dashcam video iti baet ti panagbusina ken naalumanay a panagbugaw ti aso iti dalan ket ad-adda a nagidda daytoy ken arigna nagdata a nagidda tapno agkiddaw ti belly rub imbes a pumaigid.
Nagballaag met ni Gaerlan kadagiti driver nga agbalin a naannad ken paatiddogen ti pasensya kadagiti dingwen iti kalsada.
Innayonna nga agbalin pay a naannad dagiti pet owner ket pagtalinaeden a natalged dagiti tarakenda gapu ta saan nga amin a driver ket adda asina iti dingwen.
