LAOAG CITY – Naglikudan ni Mr. Carlito Caldito, maysa a mangisursuro iti Divine World College of Laoag (DWCL) dagiti saan nga umno nga alegasion kontra kenkuana.
Daytoy ket kalpasan a nakaala daytoy ti nagduduma a negatibo a reaksion manipud kadagiti 3rd year students mainaig panagturongda koma iti Cebu ken Bohol kas paset ti subjects-da a travel and tours.
Kunana a basar iti inisial a napagsasaritanda ket agpasyar da kuma kadagiti nasao a lugar ngem naamoanna a saan a kabaelan dagiti dadduma nga estudiante ti pinansial a gastos isut gapu na a napanunotanna a mangiyuswat ti sabali nga aktibidad tapno saan a madagsenan dagitoy.
Napagnunumoanda a mangipatakderda ti booths a maitampok dagiti nagduduma a napintas a lugar iti pagilian no sadinno nga immanamong met dagiti estudiante ken naaddanda ti agdagup 5,000 a ribu a pisos a kontribusion iti tunggal estudiane.
Apaman nga immanamong dagitoy ket naipaayanda ti parents waiver para it pammalubos dagiti nagannak.
Inlawlawagna a ti bayadan dagiti estudiante ket isuda met laeng ti mangusar para iti pannakaipatakder ti booths, souvenirs, uniforms, kanen dagiti bisita, ken dadduma pay.
Kinunana nga adda dagiti produkto nga ilako dagiti estudiante a ti mapastrekanda ket pagbibingayanda, daytoy nga aktibidad ket agpaot ti las-od tallo nga aldaw no sadinno nga agimbitarda kadagiti nagduduma a bisita a pakairamanan dagiti Local Government Unit (LGU).
Impettengna a ti kangrunaan a gagemna ket makatulong kadagiti estudiante a maaddaan ti naan-anay a kapadasan pakaseknan ti turismo.
Kabayatanna, idinto a naipadanon iti Dean daytoy a reklamo ket insigida a nakanselar ti aktibidad ken saandan nga ituloy ti nasao nga aktibidad.
Innayonna nga ibasarda lattan kadagiti quizzes ken exams ti pinal a grado dagiti estudiante.
