LAOAG CITY – Nagbubutosan ti Senate Impeachment court ita nga aldaw, Setiembre 23 ti pannakaibaba ti voting threshold a kasapulan tapno ma-convict ni Vice President Sara Duterte iti impeachment trial.
Daytoy ket kalpasan ti panagsinnukat ti argumento dagiti House prosecution panel ken defense team ti bise president.
Namunganay daytoy iti motion for reconsideration ni Senator-Judge Erwin Tulfo kontra iti ruling ni Presiding Officer Chiz Escudero a ti pagibasaran a bilang dagiti butos a kasapulan tapno ma-convict ti impeachable official ket ti amin a 24 a senador.
Pimmabor dagiti majority ti senator-judge iti mosion ni Sen. Erwin Tulfo a talantanen ken pagbubutosan ti Senate Impeachment Court ti posibilidad a panagbaliw iti denominator para iti 2/3-vote treshold nga agserbi kas pagibasaran iti conviction wenno acquital ni VP Sara Duterte.
Pakairamanan kadagiti saan a naibilang, basar iti ruling ni Trial Presiding Officer, Sen. Chiz Escudero, ket dagiti senador a naka-detain, dagiti saan a masinunuo no ayanno ti nagturonganda, ken dagiti awan abilidadna a makipaset iti impeachment trial gapu iti medical condition.
Idi laeng kallabes, inimbitaran ti impeachment court da retired Supreme Court Chief Justices Artemio Panganiban, Reynato Puno, and Hilario Davide Jr. and Associate Justice Adolfo Azcuna kas amici curiae wenno friends of the court.
Kuna ni Panganiban, Puno, ken Davide a ti voting threshold ket masapul a maibasar iti bilang dagiti aktibo a senator-judges a makiparpartisipar iti impeachment trial.
Nupay kasta, kuna met ni Azcuna, maysa kadagiti nangbukel ti 1987 Constitution a ti voting threshold ket masapul a maibasar iti entero a miembro ti Senado no sadinno a kasapulan ti 16 a senator-judges tapno ma-convict ti maysa nga impeachable official.
