LAOAG CITY –Kalikagum ni Mr. Norberto D. Dadiz Sr., ti Kapitan ti Barangay 15 San Marcos, iti ili ti San Nicolas a pilaan ti kaso ni Mr. Oscar Gagala Jr. residente ti Barangay 14 San Lucas gapu iti saan nga umno nga alegasion kontra kenkuana.
Segun ken ni Dadiz, namunganay daytoy ti panag-parking ni Gagala iti Barangay 15 San Nicolas no sadinno a simmangpet daytoy manipud Hawaii ket insigida nga in-park-na ti luganna iti barangay hall.
Basar iti pannakisarsarita ti Bombo Radio Laoag ken ni Dadiz, kunana a nagparking ni Gagala nga awan ti permisona ngem pinabus-oyanna daytoy gapu ta ti ammona ket apag biit laeng ngem dimmanon ti mano nga aldaw ti panag-parking-na.
Idinto ta mangiyuswatda ti flag ceremony, ditoy nga imbilin ni Dadiz kadagiti sumagmamano nga opisial tapno kiddawen ken ni Gagala nga ilisi ti lugan gapu ta awan ti espasio a pagplastaranda.
Mainaig iti daytoy, apaman a mailisi ti lugan, nagpakaasi ni Dadiz a saanda a pagbalinen a parking lot ti barangay hall iti napaot a panawen ket mabalin laeng no apag biit.
Gapu iti balligi a pannakailisi ti lugan, ti ammo ni Dadiz nga awanen ti aniaman a reklamo ken nagkinnaawatan ti agpada a partido, ngem saan ta indublida laeng ti nag-park iti nasao a barangay hall.
Idinto ta inlawlawag manen ni Dadiz a mabalin laeng ti ag-park ti apagbiit ket nagturong ni Gagala iti barangay hall ken ditoyen a pinagsaoanna ti dakes ken ado dagiti akusasionna iti kapitan.
Inlawlawagna a maiparit gapu ta makatubeng daytoy kadagiti aktibidad ti barangay hall ken awan ti parking-an dagiti barangay officials.
Apaman ti panagsasao ni Gagala, impetteng ni Dadiz a saan a simmungbat gapu ta kasapulan ti ‘maximum tolerance’ ken adda ti umno a lugar tapno pagsaritaan ti problema.
Kuna ni Dadiz a gapu ta saan nga agtalna ni Gagala ket nagturong a mismo daytoy iti Barangay 14 tapno mangipila ti summon.
Nagkedked met ni Gagala a permaan ken akseptaren ti summon no sadinno a ti naiskedyul nga aldaw ti panagsangoda kuma ket kabigatanna nagturongen daytoy iti Hawaii.
Impetteng ni Dadiz nga aramidenna amin iti kabaelanna tapno pagawiden ni Gagala ken inyuman na ti reklamo iti abogado tapno isaklang daytoy.
Iti agdama, ipapauray ti Bombo Radio Laoag ti sungbat ni Gagala para iti nasao a problema.
Naamoan a ni Dadiz ken Gagala ket nasinged nga agkabagyan.
