LAOAG CITY – Naipasa iti konseho ti maysa a resolusion para iti pannakaiyuswat ti training iti nagduduma a pagopisinaan para kadagiti Barangay Officials ditoy siudad ti Laoag.
Immunan iti daytoy ket ti pannakaibunong dagiti 40 a multi-purpose vehicle iti tunggal barangay iti siudad.
Inbatad ni Sangguniang Panlungsod Member Jaybee Baquiran nga adda ti nakitana nga online post a nausar dagitoy iti pannakaitaray kadagiti agsakit a kabarangayan iti ospital.
Gapu iti daytoy, kunana a nasaysayaat no adda ti umdas nga impormasion no kasano ti umno a panangasistir iti maysa a pasiente kas iti kabaranggayanda.
Kunana nga iti babaen ti naipasa a resolusion ket maikiddaw iti City Disaster Risk Reduction Management Office, City Health Office, ken Red Cross ti mangisayangkat ti Capacity Building and Training kadagiti barangay officials, volunteers, ken dagiti designated personnel a mangmanehar iti multi-purpose vehicle.
Gagem ti nasao a resolusion a mapapigsa ti kapasidad ken kabaelan dagiti agresponde iti tiempo ti didigra wenno aniaman nga emerhensia.
