LAOAG CITY – Agserbi ni Senior Associate Justice Marvic Leonen kas acting Supreme Court (SC) chief justice iti panagretiro ni Chief Justice Alexander Gesmundo intono Nobyembre 6 ita a tawen.
Daytoy ti inrakurak ni Supreme Court spokesperson Atty. Camille Ting.
Inlawlawag ni Ting a naipalaon iti Section 12 ti Republic Act No. 296, wenno ti Judiciary Act of 1948, a no mabakantean ti posisyon ti Chief Justice, dagiti trabaho ken bileg ti Chief Justice ket ipatungpal ti most senior Associate Justice agingga nga awan ti madutukan a baro a Chief Justice.
Kuna na a masapol a malitupan ti nabakantean a posisyon iti Korte Suprema iti uneg ti 90 nga aldaw.
Innayon na a mangpili ni President Ferdinand Marcos Jr. iti baro a Chief Justice manipod iti listaan dagiti nominees a naisagana babaen ti Judicial and Bar Council (JBC).
Nakalukat metten ti application ken nomination process para iti nasao a posisyon ken ti deadline ket intono Oktubre 13, 2026.
Inimbitaran met ti Judicial and Bar Council da Senior Associate Justice Marvic Leonen ken Associate Justices Alfredo Benjamin Caguioa, Ramon Paul Hernando, Henri Jean Paul Inting ken Rodil Zalameda tapno agaplikar iti nasao a posisyon.
