LAOAG CITY – Itultuloy latta ti Department of Justice (DOJ) dagiti kaso a naipila mainaig iti panagpukaw dagiti mammallot uray saanen a makikokoordinar ti sumagmamano a pamilya dagiti biktima kadagiti prosecutors.
Segun ken ni Prosecutor General Richard Anthony Fadullon, saan a nakadepende iti presensya wenno pannakipaset dagiti pamilya ti panagtultuloy ti criminal aspect dagiti kaso.
Iti agdama, 26 nga impormasyonen ti naipila kontra kadagiti karaman iti kaso, karaman ti 10 a bilang ti kidnapping with homicide ken 16 counts ti kidnapping with serious illegal detention.
Inlawlawag ni Fadullon a napatpateg ti pannakipaset dagiti pamilya no maipapan iti civil aspect ti kaso, kas ti pammaneknek iti mabalin a danyos a kiniddaw da.
Kuna na pay nga agduma ti ebidensya a kasapulan tapno mapaneknekan ti criminal liability ken ti ebidensya a kasapulan para iti possible a damages.
