LAOAG CITY – Inpasigurado ni Senate President Win Gatchalian a matuloy latta ti impeachment trial ni Vice President Sara Duterte uray adda naipila a petition iti Supreme Court a mangkukwestion iti proseso ti panangusig.
Segun ken ni Gatchalian, awan pay naiparuk-at a temporary restraining order wenno TRO ti Korte Suprema isu awan ti rason tapno isardeng ti impeachment trial.
Mainaig iti saludsod no kasano nga ituloy ti panangusig no saan nga agatendar ti depensa inton sumaruno a trial, inbatad ni Gatchalian a responsibilidad ti impeachment court nga ituloy ti panangusig ken agdesision basta adda quorum ti Senator-Judges.
Inpaganetgetna a desision ti defense panel no pilienda nga saan nga agatendar.
Nupay kasta, inpakaammo ti Senate President nga awan pay nangngegna a plano manipud kadagiti Senator-Judges nga saan nga agatendar wenno makipaset iti panagbobotosan.
Dinakamatna nga uray dagiti miembro ti minority ket agtultuloy latta ti panagatendar kadagiti aktibidad ti Senado.
Kabayatanna, inrakurak ni Gatchalian a suroten ti impeachment court ti nagbalin a ruling mainaig iti damag no masapul nga agatendar ken makipaset dagiti Senator-Judge tapno agbalin a kualipikado dagiti botos-da.
No man mangiparuk-at ti baro a desision ti Supreme Court mainaig dagiti petition, kunana a sangoenda laeng daytoy no addan ti aktual a ruling.
Iti agdama, pinasingkedanna a nalawag ti posision ti impeachment court nga agtuloy ti impeachment trial.
