LAOAG CITY – Kinarit ti Malacañang dagiti Senador a mangak-akusar ken ni Presidente Ferdinand Marcos Jr. a makibibiang ti impeachment trial ni Vice President Sara Duterte a mangiruarda ti ebidensia wenno dokumento a mangipaneknek ti akusasionda.
Inbatad ni Palace Press Officer ken Communications Undersecretary Claire Castro a saan a nasken a sungbatan ti Malacañang dagiti alegasion nga awan ti naan-anay nga ebidensiana.
Inlawlawagna a rumbeng a mapaneknekan nga umuna dagiti mangak-akusar iti presidente no addaan daytoy iti pannakibiang iti agbalin a decision iti Senado.
Kabayatanna, saan met a nangiruar ti Malacañang ti statement mainaig iti nagbalin a ruling iti senate impeachment court a nangbaliw iti dati a 16-vote requirement para iti conviction.
Gapu daytoy, nangipilan ti petition for certiorari ken prohibition iti Korte Suprema idi Setiembre 24.
Kuna ni Castro a saan a maysa a partido ti executive branch mainaig iti kaso isut gapuna a respetaren ti Malacañang ti aniaman nga agbalin a desision ti Korte Suprema.
Innayonna nga iti ruling iti high court ket agbalin a paset iti jurisprudence ket nasken a masurot, malaksid laeng no masukatan daytoy wenno maabandonar iti legal doctrine.
