LAOAG CITY – Nakanselar ti trabaho iti opisina ti gobierno inton bigat a mangrugi iti alas-1 ti aldaw Setiembre 28 kas paset ti panangselebrar ti 34th National Family Week.
Iti salinong ti imparuk-at ti Office of the President a Memorandum Circular No. 136, makanselar ti trabaho iti Executive branch, pakairamanan dagiti government-owned wenno controlled corporations (GOCCs) ken kadagiti state universities and colleges, a mangrugi iti alas-1 ti aldaw iti nasao nga aldaw.
Ti nasao a circular ken nai-issue babaen iti Proclamation No. 60, series of 1992, a nangideklarar ti maudi a lawas ti Setiembre iti kada tawen kas Family Week ken iti Proclamation No. 326, series of 2012, a nangdeklarar met ti maika-uppat a Lunes ti Setiembre iti kada tawen kas aldaw ti “Kainang Pamilya Mahalaga”.
Kabayatanna, dagiti ahensia a responsable kadagiti delivery dagiti basic ken health services, disaster and calamity preparedness and response ken kadagiti nangnangruna a serbisio ket saan a karaman kadaytoy ken agtultuloy ti operasionda.
