LAOAG CITY – Inlawlawag ti maysa a tricycle driver a ni Mr. Melvin Miguel maipanggep iti panagsingir na ti P300 a pisos manipod iti dua nga estudyante a pasahero na a nagpaitulnog iti ili ti Vintar.
Inbatad na a sakbay nga inlugan na dagiti dua nga estudyante iti mall ditoy ciudad ti Laoag ket dinamag na no mano ti pagplet-plete da no sadinno nga insungbat da met a P250.
Gapu iti daytoy, nakisarita ni Miguel a no mabalin ket nayunan da laengen ti 50 a pisos aglalo ket rabii, banag nga inanamongan met dagiti dua nga estudyante.
Inpakaammo na nga idi nakadanun da iti ili ti Vintar ket sinabat ida ti ama ti maysa nga estudyante ken inbatad na nga umanay koma metten ti 250 a pisos, ngem insungbat na nga isu met ti napagsasaritaan da.
Innayon na a ti laengen insungbat ti ama ti pasahero ket awan ti mabalin no isu ti napagsasaritan dan a pagplete, isut gapuna a nasdaaw ken nakarikna ti nakaro a panagbain idi makita na a naipost iti social media aglalo iti facebook ti prangkisa ti tricycle na.
Inpalgak ni Miguel a mabain unayen iti pannakailanlandayag ti prangkisa na ken saanna payen a masurutan ti agpasada gapu iti panangpanpanunot na iti ibilangna a pannakaibabain na.
