LAOAG CITY – Binilin ti Korte Suprema a mangisubmitir dagiti respondent mainaig iti panangkwestionarda iti Republic Act No. 12326 wenno ti gakat a pannakaitantan ti 2026 Barangay ken Sangguniang Kabataan Elections (BSKE) inton Nobiembre 2028.
Ti petision ket impila ni veteran election lawyer Romulo Macalintal a nagkiddaw pay ti temporary restraining order (TRO) wenno status quo ante order kontra iti pannakaipatungpal ti nasao a linteg.
Mainaig iti daytoy, impaayan ti Korte Suprema dagiti respondent ti non-extendible a lima nga aldaw kalpasan ti pannakaawatda ti notice tapno isubmitirda ti komentoda.
Immunan iti daytoy, iti salinong ti Republic Act No. 12326, naipan ti Barangay ken Sangguniang Kabataan Elections (BSKE) inton Nobiembre 2028 ken ti pannakaipaot ti termino dagiti incumbent barangay ken Sanguniang Kabataan officials ti lima a tawen.
Iti pannakaaubrubar ti nasao a linteg, kwinestionaran ni Macalintal ti constitutionality ti linteg, no sadinno inpettengna a nilabsingna daytoy ti karbengan dagiti botante nga agpili kadagiti opisial a kalikagumda a mangidaulo kadakuada.
