LAOAG CITY – Nagkari ni Presidente Ferdinand Marcos Jr. a paigetan ti gobierno ti seguridad dagiti pagadalan ken ti professional development dagiti mangisursuro iti intero a pagilian.
Iti panagbitla ti presidente iti National Teachers Month, inbatad na nga agtultuloy ti pannakikoordinar ti gobierno kadagiti nagannak, komunidad ken dadduma pay nga stakeholders tapno pagbalinen a nataltalged ken maipaay ti kasapulan dagiti estudyante kadagiti pagadalan.
Inpaganetget na pay ti pannakapasayaat iti panagsagana ken panagsanay dagiti mangisursuro iti sibubukel a panawen ti karera da.
Karaman dagiti addang ti administrasyon ti Teacher Education Roadmap 2035, scholarship program para iti Teacher Education Centers of Excellence, ken My Teacher Education Commons (MyTEC), maysa a digital platform para iti agtultuloy a pannakasursuro dagiti mangisursuro.
Segun ken ni Presidente Marcos Jr., napateg ti papel dagiti mangisursuro iti baet ti panagdur-as ti teknolohiya ken artificial intelligence gapu ta saan a kabaelan a sukatan ti teknolohiya ti panangbayabay ti maysa mangisursuro kadagiti agad-adal.
Ginutigot met ni Presidente Marcos Jr. dagiti mangisursuro a surwan dagiti estudyante nga agbalin a naridam, nasirib iti panagdesisyon ken ammo na nga isakit ti pada a tao.
Nagyamanan ti presidente dagiti mangisursuro iti intero a pagilian iti panagregget ken dedikasyon da.
