LAOAG CITY – Nagballaag ni Mrs. Marites Maynes, ti Senior Labor and Employment Officer ti Department of Migrant Worker ditoy ciudad ti Laoag kadagiti umili mainaig iti illegal recruitment.
Segun kenkuana, agraira manen iti illegal recruitment ditoy probinsia a ti kangrunaan a mabikbiktima ket dagiti damo na iti agabroad.
Inbatad na nga adon dagiti nagturong iti opisina da gapu iti illegal recruitment ken inpasigurado na met ti pannaka-asistir a naimbag dagitoy babaen ti panagpila da ti kaso.
Mainaig iti daytoy, kuna ni Maynes a sakbay da nga agaplikar kadagiti overseas employment ket masapol nga iberipikar da pay laeng nga umuna no daytoy ket lehitimo wenno saan.
Inlawlawag na a saan a basta i-click dagiti link wenno mamati aglalo no dagitoy ket dumawat a sigod iti dakkel a bayad iti panagaplikar da wenno dakkel unay iti idiaya da a sweldo.
Innayon na a mabalin da nga agturong mismo iti opisina da iti Department of Migrant Worker tapno maiberipikar dagitoy no lehitimo wenno saan.
