LAOAG CITY – Kinissayan ti National Water Resources Board (NWRB) ti alokasion ti danum manipud iti Angat Dam nga agturong iti Metropolitan Waterworks Sewerage System (MWSS) para iti supply ti nadalus a danum iti Metro Manila.
Basar iti board, manipud iti dati a 52 cubic meter per second (CMS) a danum ket umabot laengen iti 44 agingga iti 46 cubic meter per second ti manarimaan nga alokasionnan.
Ti nasao a pannakabalbaliw ket paset ti panagsagsagana para iti El Niño a manamnama a mapasaran iti maudi a paset ita a tawen agingga iti umuna a quarter inton sumaruno a tawen.
Segun ken ni Metropolitan Waterworks Sewerage System Water and Sewerage Management Department Manager Patrick James Dizon, umuna pay laeng a panagtignayda daytoy iti panagin-inot ti danum sakbay ti manamnama a nakaro nga El Niño.
