LAOAG CITY – Inbatad ni Mrs. Cecelia Antonio, Principal IV iti Laoag Central Elem School ditoy ciudad ti Laoag a selebraran danto paylaeng ti Teacher’s day intono biernes, Oktubre 9 imbes nga ita nga aldaw Oktubre 5.
Inlawlawag na nga adda da iti instructional block isut gapuna a saan a mabalin a maistorbo ti panagklase dagiti estudyante.
Kuna na pay a maiyuswat to ti selebrasyon mangrugi iti oras ti ala-tres ti malem kalpasan ti panagklase dagiti ubbing.
Sakbay iti dayta, inpakaammo ni Antonio nga adda met ti maisayangkat a selebrasyon para iti Teacher’s day iti division level iti oras ti alas-tres ti malem intono huwebes, Oktubre 8.
Nagyaman ken naragsak ni Antonio gapu ta itay bigat nga isasangpet da iti pagadalan ket nagkablaaw kadakuada dagiti nagannak ken agad-adal iti selebrasyon ti Teacher’s day ita nga aldaw.
Kabayatanna, kuna ni Antonio a no maipapan dagiti aktibidad a maisayangkat iti selebrasyon ti Teacher’s day intono biernes ket awan ti ammo da gapu ta ti mangorganisar iti daytoy ket ti Parent-Teacher Association ken ti Supreme Elementary Learner Government.
Innayon na a ti laeng nadamag kenkuana ket no ania nga aldaw ken oras ti mabalin da a panagselebrar.
Mainaig iti daytoy, inpakaammo ti maysa a Grade 10 student a ni Cristine Julian iti Laoag Central Elementary School nga adda met ti insagana da a para iti adviser da iti panangselebrar da ti Teacher’s day intono biernes.
Segun kenkunana, ti kangrunaan na nga insagana da ket dagiti pagsasangwan danto a taraon para iti nasao a selebrasyon kas ti cake, barbeque, spaghetti ken dadduma pay.
Kuna na a kanayun da a pagungeten ti adviser da isut gapuna a rumbeng nga agaramid da met ti mabalin a pakaragsakan na kas panangiparikna da met a napateg isuna kadakuada.
