LAOAG CITY – Napeggad para kadagiti masikog a babbai ken dagiti kaipasngay a maladaga ti nakaro a kinabara ti panawen.
Daytoy ti inbatad ni United Nations climate chief Simon Stiell.
Iti panagsarita ni Stiell iti summit iti Nadi, Fiji, inrakurak na ti baro a survey a mangipakpakita ti nasurok a 2/3 dagiti health professionals iti lima a kontinente ket nakakita ti komplikasyon nga intunda ti nakaro a kinabara ti panawen iti napalabas a lima a tawen.
Nagballaag a ti panagngato ti temperatura ket kaipapan ti pannakaikabil met iti peggad iti panagsikog ti maysa a babai.
Inlawlawag ni Stiel a ti nakaro a kinabara ti panawen kabayatan ti panagsikog ket dakkel iti risgo na iti panagpasngay a premature, pannakatay ti ipasngay a maladaga, nababa ti timbang ken komplikasyon iti ina.
