LAOAG CITY – Inbutaktak ti aktor a ni Zanjoe Marudo a masikog ti asawa na a ni Ria Atayde iti maikadwa nga anakda.
Daytoy ti naragsak a damag nga inburay ni Zanjoe kabayatan ti special screening ti CinePanalo 2026 entry nga Apol of My Ai.
Maipalagip a ti inauna nga anak a lalaki da Zanjoe ken Ria a ni Marcel Sabino ket agtawenen ti dua, ken iti agdama ket sumagmamano a bolan metten ti sikog ti aktres iti maikadwa nga anak da iti aktor.
Segun ken ni Zanjoe, ibilang na a baro a blessing iti pamilya da ti isasangbay ti maikadwa nga anak da ken ni Ria ngem saanen nga indetalye ti aktor no mano a bolanen ti sikog ti asawa na.
Innayon na nga aniaman ti kinatao ti maikadwa nga anak da ken ni Ria, awan ti problema kenkuana gapu ta ti napateg ket naragsak da gapu ta maaddaan da manen ti anak.
Kabayatanna, dinayaw ni Zanjoe ni Ria gapu iti panagbalin na nga hands-on mom iti anak da.
Inburay met ti aktor dagiti makaay-ayo nga ugali ti anak da kas iti panagbalin na a nakulit ken ti panagbalin na a pilyo nga isu ti kanayun a mangparparagsak kadakuada a sangapamilya.
