LAOAG CITY – Naideklarar ti State of calamity iti 106 a lugar gapu iti epekto ti El Niño phenomenon.
Segun iti National Disaster Risk Reduction and Management Council (NDRRMC), dagiti lugar a nakaideklararan ti state of calamity ket manipod iti lima a rehiyon a pakairamanan iti sumaganad:
Cagayan Valley – 66
Calabarzon – 4
Bicol – 12
Soccsksargen – 1
Caraga – 23
Adda met ti 39 a wild, forest, ken mountain fire incidents a nairekord iti Caraga Administrative Region.
Inpakaammo ti NDRRMC nga adda pay ti uppat a ciudad ken municipalidad ti naireport a naaddaan ti water supply interruptions, idinto a 33 localities ti napilitan a nangsuspenso ti klase na iti rehiyon.
Innayon ti NDRRMC nga iti agdama ket umaboten iti 104,149 a pamilya wenno 388,375 nga indibidual ti nairekord a naapektaran ti El Niño, partikular iti Cagayan Valley, Bicol, Calabarzon, ken Caraga.
Mapatta-patta met nga umaboten iti P5.56 billion ti balor dagiti nadadael iti agrikultura gapu iti epekto ti El Niño iti pagilian.
