LAOAG CITY – Intudo ni Vice President Sara Duterte a ti administrasyon Marcos ti adda iti likudan dagiti alegasyon a maibatbato kontra kenkuana.
Segun ken ni Duterte, maipagarop nga us-usren ti communication office ti administrasyon dagiti isyu nga adda ti pakainaigan iti panagkunniber a rumbeng a sungbatan ni Presidente Ferdinand Marcos Jr. tapno maibaw-ing ti basol kenkuana.
Inpetteng pay ni Duterte a nangrugi a mismo ken ni Presidente Marcos Jr. ti isyu ti maipagarop a “maleta scheme,” kalpasan a nairaman dagiti rakurak ti maysa a testigo a maikonkonektar ken ni dati nga Ako Bicol Partylist Rep. Zaldy Co.
Kuna ti bise presidente a maipagarop a nakaawat ti maleta ti presidente, basar iti testigo ni Co ngem agpapan ita ket awan pay ti sungbat na.
