LAOAG CITY – Naituloy ti pannakaitingiting kadagiti bank records da Vice President Sara Duterte ken ti asawana a ni Atty. Mans Carpio kalpasan ti panangiprisintar ti Anti-Money Laundering Council (AMLC) ti summary dagiti bangkoda.
Maipalagip a ginandat ti kampo ti depensa ti pannakailiklik ti panagtestigo ni AMLC Executive Director Ronel Buenaventura gapu iti bank secrecy law, ngem imbasura daytoy ni Presiding Officer Chiz Escudero.
Pinalagan met ni Senator-judge Imee Marcos ti pannakaiprisintar dagiti foreign currency account dagiti dua a maakakusaran, ngem kas iti depensa, imbasura pay daytoy ni Escudero a segun kenkuana, mausar dagiti nasao a dokumento kas ebidensia.
Kabayatanna, basar iti insubmitir ni Buebaventura a dokumento, umabot iti P4.4 billion ti pakabukelan a suspicious transactions a direkta a nairekord kadagiti bank account dagiti agasawa, malaksid iti P4.5 billion a simmrek iti 15 a korporasion nga adda iti business interest-da.
Mainaig iti daytoy, karaman kadagiti nairekord ti AMLC ket ti maysa a transaksion idi Marso 28, 2014 no sadinno a nakaawat ti P193,705,615.88 ti joint account ni Sara Duterte ken ti amana a ni dati a Presidente Rodrigo Duterte.
Malaksid kadaytoy, kinumpirmaran pay ti AMLC a nakaawat ti negosio ni Carpio a CALE88 Foods Corp. ti P319,326,770.41 a pondo manipud iti mainland China ken ti Hong Kong.
