LAOAG CITY – Umaboten iti sumurok P5.5 billion ti pakabuklan a gatad ti nadadael iti sektor ti agrikultura iti nagduduma a paset iti pagilian gapu iti agtultuloy nga epekto ti nakaro nga El Niño.
Basar iti naudi a datos manipud iti National Disaster Risk Reduction and Management Council wenno NDRRMC, umaboten iti 201,322 dagiti mannalon ken mangngalap ti direkta a naapektaran ken napukawan ti kangrunaan a pangsapulan gapu iti tikag.
Naamoan a ti kakaroan a natamaan ti nakaro a tikag ket ti Rehion 2 (Cagayan Valley), simmaruno dagiti rehion ti CALABARZON, Rehion 5 (Bicol), Rehion 9 (Zamboanga Peninsula), Rehion 11 (Davao Region), Rehion 12 (SOCCSKSARGEN), ken CARAGA.
Agtultuloy met ti pannakaipatulod ti tulong dagiti nagduduma nga ahensia ti gobierno ken lokal a gobierno tapno maibunong dagiti ayuda ken alternatibo a pagsapulan kadagiti pamilia a sobra a naapektaran ti didigra.
Kabayatanna, manamnama pay ti ad-adda a pinaiget a monitoring kadagiti lugar a makapaspasar ti kinakurang iti danum tapno maliklikan ti ad-adda a dakkel a pannakalugi kadagiti sumaruno nga apit.
