LAOAG CITY – Inbatad ni Mayor James Bryan Alcid a kasapulan ti insigida a pannakaipatungpal ti panagngato ti plete ti tricycle ditoy siudad ti Laoag.
Daytoy ket gapu iti agtultuloy a panagngato ti presio ti produkto a petrolio.
Kunana nga immunan iti daytoy ti naawat ti City Government a kiddaw dagiti gunglo ti tricycle drivers ken operator a maipangato ti plete idi pay laeng bulan ti Marso ita a tawen.
Segun kenkuana, nakisarsarita daytoy iti transportation sector a saanda pay laeng a mabalin nga ipangato ta posible nga adda tsansana a bumaba.
Nupy kasta, impakaammona a kageddan daytoy ket nangipaay ti gobierno ti subsidy a pakairamanan ti national nga addaan gatad a P5,000, Provincial Government of Ilocos Norte P3,000, ken idinto a P3,000 ti inpaay ti City Government.
Inlawlawagna a ti P3,000 ket mangipaay ti maysa ken gudwa a bulan a proteksion dagiti tricycle drivers ken operators no sadinno a pakabuklan ti 4 a bulan a proteksion manipud di Marso.
Innayonna nga iti agdama, makitada ti agtultuloy a panagngato ti presio ti produkto a petrolio ken kasapulan ti insigida a pannakaipatungpal ti pannakaipangato ti plete dagiti tricycle ditoy siudad ti Laoag.
