LAOAG CITY – Ipaayan ti Local Government of Laoag City ti umno a solusion ti suplay ti danom iti Laoag City Public Market a kas paset ti renovation ti pasilidad.
Segun ken ni Laoag City Mayor James Bryan Alcid, a napasaran idin ti problema ti suplay ti danom iti mercado isut gapuna a naiwayat ti maysa a survey tapno maipaay ti umno a solusion ti nasao a problema.
Kinunana a no man mapasaran manen ti panakurang wenno kinaawan ti suplay ti danom ket nakasagana latta dagiti water trucks iti siudad tapno tumulong.
Innayonna a sisasagana latta dagiti nasao a water trucks tapno mangalay-ay ti danom iti mercado ken agtultuloy ti koordinasion ti lokal a gobierno tapno masigurado nga adda umdas a supply ti nasao a lugar.
Kabayatanna, kinunana a nangrugin iti retrofitting iti pasilidad, pakairamanan dagiti paset a kasapulan ti pannakaurnos iti Laoag City Public Market and Commercial Complex.
