LAOAG CITY – Natay ti maysa a lalaki kalpasan a nadisgrasia iti paset ti national road iti Barangay Tabug iti siudad ti Batac.
Ti biktima ket agtawen 65, maysa a mannalon, awanan asawa ken residente iti nasao a siudad idinto a ti nakadinnungparna ket maysa nga agtawe 39, awanan asawa, ken residente iti siudad ti Laoag.
Segun ken ni P/Capt. Junjun Medina, Deputy Chief of Police ti siudad ti Batac a ti disgrasia ket nakairamanan ti maysa a motor nga inusar ti biktima nga awan ti tail light, head light, ken arigna ket motor nga awan dagiti kangrunaan a paset ti piyesana idinto a ti maysa ket Super White Toyota Hilux.
Kinunana a ti biktima ket agturong iti abagatan a direksion idinto a kellaat nga immakar iti bangir a linya no sadinno a manarimaan ti panagdalyasatna iti amianan a direksion.
Gapu iti daytoy, nagsagaba ti biktima ti nakaro a sugat iti bagina pakairamanan ti ulona.
Insigida met a naitaray ti balay pagagasan ti biktima ngem gapu iti nakaro a sinagabana ket naideklarar daytoy a dead on-arrival ii babaen ti the attending physician, Dr. Ulysses Gaygay.
Binallaagan met ni P/Capt. Medina dagiti motorista ti kinapateg ti panagusar ti reflectorized vest, ti saan a panagmaneho no nabartek, ken ti kanayon a panagan-annad no agmaneho.
Naamoan a ti biktima ket igawgawid ti pamiliana a saan a rumuaren gapu ta addaan daytoy ti impluensia ti arak, nakauyos a nagmaneho, awan helmet-na, ken awan reflectorized vest-na.
