LAOAG CITY – Kinumpirmaran ti Malaysian Maritime Enforcement Agency (MMEA) ti pannakaibalud dagiti 65 a crew ti maysa a Filipino fishing vessel.
Dagiti nasao a tripulante ket manarimaan a nakabalud idiay Sabah, Malaysia, kalpasan a natiliw dagitoy dagiti Malaysian Coast Guard gapu iti maipagarup unauthorized fishing iti kabaybayan a sakupen ti nasao a pagilian.
Segun iti Malaysian Maritime Enforcement Agency, natiliw dagiti Filipino crew kalpasan ti panangiwayatda ti patrol idi Setiembre 27.
Malaksid kadagiti nakabalud a crew, kinumpiskar pay ti Malaysian authorities ti fishing vessel ken dagiti ramit dagiti nasao a mangngalap.
Iti immunan a report dagiti Malaysian media outlets, umabot iti uppat a tonelada a maritime products ti naala iti nasao a barko a maipagarup agdagup dagitoy ti 350,000 Malaysian ringgits wenno sumurok-kumurang P5 million.
Maipagarup awan ti naiprisintar dagiti crew a balido nga identification documents ken work permits isu ti gapuna a naakusaran dagitoy a naglabsing iti immigration laws ken iti Fisheries Act of 1985, maysa a naruay a fishing law ti Malaysia.
