LAOAG CITY – Dinutokan ni Presidente Ferdinand Marcos Jr. ni People’s Television Network (PTV-4) General Manager Lino Cayetano a sumaruno a mangidaulo iti Presidential Communications Office (PCO), kasukat ni Dave Gomez.
Kinumpirmaran ni Marcos ti naikeddeng a panagsukat ti liderato iti nagbalin a rakurakna iti Kapihan idiay Singapore.
Segun iti Presidente, pormal a maiwayat ti panagbaliw ti liderato inton agsubli daytoy iti Pilipinas.
Nupay kasta, nagkedked met ti Presidente a dakamaten ti aldaw ti opisial a panagtugaw ni Cayetano kas mangidaulo iti Presidential Communications Office.
Maipalagip a nadutokan ni Cayetano kas general manager ti PTV-4 idi Hunio kadaytoy laeng a tawen.
Immunan iti daytoy, nagserbi daytoy kas Mayor iti Taguig City manipud iti tawen 2019 agingga 2022 ken pannakabagi ti maika-dua a distrito ti siudad iti Kamara manipud iti tawen 2013 agingga 2016.
Kabayatanna, ti manamnama a panagbalbaliw ti mangidualo iti Presidential Communications Office ket kageddan dagiti dadduma pay a posible a panagbalbaliw iti Gabinete ni Marcos.
Iti met laeng nasao a panagsarita ti Presidente, kinumpirmaranna ti panangaprubarna iti panagikkat ni Henry Aguda kas Sekretario ti Information and Communications Technology.
