LAOAG CITY – Inlawlawag ti maysa nga eksperto no kasanu a maipababa ti blood sugar ti maysa a tao.
Karaman a rumbeng nga aramiden ket ti mangkissay ti simple a carbohydrates babaen ti pananglimitar ti puraw nga inapoy, puraw a tinapay, patatas ken pasta.
Napinpintas no pilyen ti brown rice, oatmeal, wenno wheat bread iti bassit a porsyon.
Mangan kadagiti taraon a nabaknang iti fiber gapu ta daytoy ket mangpabayag iti panangsagepsep iti asukar, kasta met a mangan kadagiti nateng kas ti parya, okra, kangkong, spinach, ken broccoli.
Malaksid kadagitoy, uminom ti umdas a danom gapu ta tulungan na dagiti bato a mangiparuk-at ti nalabes nga asukar babaen ti panagisbo, ken liklikan dagiti fruit juice ken softdrinks.
Kasayaatan pay nga aramiden ket ti regular a panag-ehersisyo ken maturog ti 7 agingga iti 8 nga oras iti rabii gapu ta no nakurang ti turog ket ngumato ti glucose.
Kamaudianan na ket kissayan ti stress gapu ta mangiparuk-at daytoy ti cortisol a mangpangato ti glucose.
