LAOAG CITY –Nagtalinaed iti temporary shelters dagiti residente nga agnanaed iti waig a Budhi Gandaki iti amianan ken tengnga a paset ti Nepal kalpasan a dadaelen ti flash flood ti atiddog a waig ken nagduduma pay nga imprastraktura iti lugar.
Dagus a nangipatungpal ti panagibakwit ti National Disaster Risk Reduction and Management Authority ti Nepal ken nangiparuk-at ti pakdaar kadagiti residente nga agibakwit iti nataltalged a lugar kabayatan ti agtultuloy a panagbantayda ti lebel ti danom iti waig.
Iti agdama, awan pay ti nairekord a natay wenno nasugatan iti insidente idinto nga agtultuloy ti imbestigasion dagiti otoridad iti rason no apay a kellaat ti panagngato ti lebel ti danom iti waig a maysa kadagiti kangrunaan a pagdalyasatan ti danom iti paset ti Kathmandu.
Napasamak ti nasao nga insidente kabayatan ti agtultuloy a panagbangon ti Nepal manipud iti napasamak idi Agosto iti nagbaetan ti Nepal ken China a nangitunda ti pannakatay ti sumurok 1,400 nga indibidual.
Kabayatanna, impakaammo met ni Nepal Prime Minister Balendra Shah a nalpasen ti search and rescue operations tapno pagpokusan ti rehabilitasion ken pannakaurnos dagiti nadadael a kalsada ken rangtay nga agkasapulan ti mapatta-patta a $4.77 bilyon.
