LAOAG CITY – Naipaiman kadagiti 40 a barangay ditoy ciudad ti Laoag ti naudi a bansada ti multi-purpose vehicle nga inpaay ti gobierno lokal ditoy ciudad.
Indaulwan ni Mayor James Bryan Alcid ti pannakaibunong dagiti multi-purpose vehicle iti baba ti Gilbert Bridge ditoy ciudad.
Inbatad ni Mayor Alcid a masapol nga ilalaen ti amin a barangay dagiti naipaay kadakuada a behikulo tapno napapaot da nga usaren.
Inpasingked na nga ado pay dagiti plano da nga ipatungpal a pagsayaatan ti amin a barangay ditoy ciudad ti Laoag.
Mausar dagiti nasao a behikulo no adda dagiti pasyente kadagiti nagduduma a barangay a nasken a maitaray iti ospital para iti naan-anay a pannakataming da.
Malaksid iti panangitaray kadagiti pasyente iti ospital ket mabalin pay nga usaren dagiti nasao a behikulo no adda ti emergency kas ti mapasamak a kalamidad wenno didigra ken dadduma pay.
Immunan nga inlawlawag ni Mayor James Bryan Alcid a saan a naggigiddan ti pannakaideliber dagiti 80 a multi-purpose vehicle a maibunong kadagiti barangay ditoy ciudad gapu ta naaddaan ti problema ti supplier.
Mainaig iti daytoy, inrakurak ti mayor a kalpasan a naipaayan aminen dagiti barangay ti service vehicle da ket sumaruno met a maikkan dagiti department heads iti lokal a gobierno ditoy ciudad ti Laoag.
Kabayatanna, inpakaammo ni ABC President Rbee Ablan a manarimaan paylaengti pannakaaramid ti guidelines iti panangusar kadagiti behikulo.
Innayon na a mangrugi met ti isayangkat da a panagsanay intono Nobyembre para kadagiti mapusgan a mangiwanwan kadagiti nasao a behikulo.
