LAOAG CITY – Nasarakan ti maysa a bangkay ti senior citizen a lalaki iti uneg ti pagtaenganna iti Barangay Caunayan iti siudad ti Batac.
Ti biktima ket agtawen ti 73, naasawaan, retirado a government employee, ken residente iti nasao a lugar.
Segun ken ni P/Capt. Alice Vicente, Deputy Chief of Police ti ciudad ti Batac, nadakamat ni Barangay Chairwoman Emelie Salvador a naipagagangay ti inaldaw a panagsagsagad ti biktima iti arubayanna iti kada bigat, ngem iti dayta nga aldaw ket saanna a makita daytoy.
Gapu iti daytoy, kinasarita ti kapitan ni Barangay Kagawad Anatacio Clavo Jr. tapno mapan iti arubayan ti biktima ken kitaen ti uneg ti pagtaengan iti babaen ti panangsirip na iti tawa, no sadinno a ditoy a nakita da ti nakaidda a biktima ken maipagarop nga awanen ti biagna.
Naamoan a ti biktima ket agsagsagaba iti kidney disease ken high blood pressure, ken dimmalan iti cardiothoracic surgery iti laeng kallabes.
Basar iti medical assessment ti City Health Office (CHO), ti biktima ket mapatta-patta a 12 nga orasen a pimmusay sakbay a nakita da daytoy.
Inpasigurado met ni P/Capt. Vicente nga awan ti foul play iti pannakatay ti senior citizen.
Naamoan a ti asawa ti lakay ket nairana nga adda iti Ilocos Sur idi napasamak ti insidente.
