LAOAG CITY – Nagpalagip ti Department of Migrant Workers (DMW) ang dagiti Overseas Filipino Worker (OFW) iti Middle East, partikular iti Saudi Arabia, nga agbalin a naannad iti panagiwaras ti impormasyon iti social media iti baet ti mapaspasamak a tensyon iti rehiyon.
Daytoy ket kalpasan ti report a panagatake iti King Khalid International Airport idi Oktubre 10, 2026 a nangitunda ti panagamak iti seguridad dagiti kadaraan iti nadakamat a pagilian.
Inpetteng ni DMW Secretary Hans Leo J. Cacdac a naiget a maipatpatungpal dagiti protocol iti Kingdom of Saudi Arabia kontra iti panagiwaras ti saan nga usto nga impormasyon wenno saan a kumpirmado a damag.
Inbalakad ti sekretaryo kadagiti Overseas Filipino Workers a liklikan ti agiwaras kadagiti palso ken saan a beripikado a damag wenno personal nga opinyon tapno saan a maikabil iti risgo iti trabaho ken panagtalinaed da iti pagilian.
Gapu iti daytoy, nagpanawagan ti DMW kadagiti mangmangged a mangala laeng ti impormasyon manipod kadagiti opisyal ken mapagtalkan a source mainaig iti sitwasyon iti seguridad.
