LAOAG CITY – Inbasura ti Supreme Court en banc ti indirect contempt petition a naipila kontra ken ni Sen. Vicente “Tito” Sotto III mainaig kadagiti kritisismo na iti desisyon ti korte iti impeachment case ni Vice President Sara Duterte.
Iti desisyon nga insurat ni Senior Associate Justice Marvic Leonen, inpetteng ti kangatoan a korte a dagiti rakurak ni Sotto ket paset ti pampubliko a diskurso iti national issue ken protprotehiran na kas political speech.
Inakusaran dagiti petisyoner iti panangidaulo ni Atty. Manuelito Luna ti senador a padpadaksen na ti panagtalek ti publiko iti hudikatura kalpasan a kwinestyunaran na ti nagbalin a desisyon ken ti pannakaawat ti ponente kadagiti pagannurutan ti Kongreso.
Inlawlawag met ti korte a dagiti pammabalaw kadagiti desisyon ti korte ket saan nga otomatiko a madusa uray pay maibilang daytoy a nasakit wenno saan nga usto.
