LAOAG CITY – Inpetteng ni Atty. Sheila Sison, lead counsel ti depensa ni Vice President Sara Duterte, a masapol nga ibasura ti sibubukel nga impeachment case ken dagiti articles of impeachment no agdesisyon ti impeachment court a saan nga awaten dagiti ebidensiya nga ipasango wenno idiaya ti prosekusyon, karaman dagiti adda ti pakainaigan iti nabatbati nga Article II.
Daytoy ket kalpasan ti ruling ti impeachment court iti panangibabawi da ti tallo manipod iti uppat nga articles of impeachment kontra iti Bise Presidente.
Segun ken ni Sison, maituloy dagiti panagdenggeg intono Nobyembre 9, 10, 11 ken dagiti sumarsaruno pay nga aldaw, ngem ti iskedyul ket maipagarop a saan a rumbeng nga ibilang a kumpirmasyon a maitultuloy ti panangusig.
Inlawlawag na a nakadepende paylaeng daytoy iti agbalin a desisyon ti impeachment court mainaig iti idiaya nga ebidensiya ti prosekusyon.
Innayon ni Sison a no saan nga awaten dagitoy ti impeachment court, ti rumbeng nga addang ket ibasura ti sibubukel a kaso.
