LAOAG CITY – Inpetteng ti abogado ni Vice President Sara Duterte a ni Atty. Paul Lawrence Lim nga adda ti maipagarup a conflict of interest ni National Bureau of Investigation (NBI) Director Jaime Santiago Matibag iti iwaywayat nga imbestigasion mainaig kadagiti alegasion ni Rodulfo M. Gracioso Jr. kontra iti Bise Presidente.
Inbatad ni Lim a maipagarup a rimmuar kadagiti dokumento a naisubmitir iti impeachment case a dati a nagsuraten kadagiti kritikal nga opinyon konrtra iti Bise Presidente ni Director Matibag.
Kwinestionaran pay ti abogado ti agtultuloy a panangipaay ti impormasion ti National Bureau of Investigation Director iti publiko mainaig iti maipagarup a progreso ti maysa nga aktibo nga imbestigasion.
Kunana nga arig mangipakpakita daytoy ti suporta iti nangakusar ken mangipaspasimudaag ti panagsungbat ti Bise Presidente ken ti pamiliana kabayatan nga agtultuloy ti impeachment trial.
Nupay kasta, kuna ni Lim a nagtalinaed ti panagtalekda iti sibubukel a National Bureau of Investigation ken mangnamnamada nga agtalinaed a propesional, patas ken saan a mausar ti ahensia para iti gagem a pangpulitika.
