LAOAG CITY – Nagballaag ni Mayor James Bryan Alcid ditoy ciudad ti Laoag kadagiti nagannak a no adda pay ti saan a nasayaat a mapasamak kadagiti pagadalan a pakairamanan dagiti annak da ket isuda ti kamaten ken pagsungbaten ti gobierno.
Inrakurak daytoy ni Mayor Alcid mainaig iti napasamak a pammagkong iti Balatong Integrated School ditoy ciudad ti Laoag iti kallabes a nakasugatan ti maysa nga estudyante.
Mainaig iti daytoy, inpakaammo ti mayor nga iti laeng kallabes ket nangisayangkat ti taripnong ti lokal a gobierno kadwa na ti Department of Education (DepEd) ken dagiti nagannak a karaman iti insidente tapno pagsasaritaan ti napasamak ken dagiti addang a rumbeng nga aramiden.
Kuna na a basar iti palawag ti principal Balatong Integrated School, adda ti maysa nga entrance ken dua nga exit iti pagadalan no sadinno nga iti exit ti simrekan ti estudyante a nangiserrek ti immuko.
Innayon na nga inlemmeng ti maseknan nga estudyante ti immuko na iti ayan ti pribado a paset ti bagina isut gapuna nga idi dimmalan iti security inspection ket nag-alarm ngem saan a gapu iti immuko no di ket ti metal iti belt na.
Inkalintegan pay ti mayor nga adda ti limitasyon iti panangkapkap kadagiti ubbing kas maiyataday iti paglintegan ken ti makunkuna a child protection.
Mainaig iti daytoy, inpakaammo ti mayor a nakapagsarita metten a naimbag dagiti nagannak dagiti maseknan nga estudyante a saanen a padakkelen ti isyu aglalo ket agpadan dagitoy a makapaspasar ti panagbully kalpasan ti insidente.
