LAOAG CITY – Nagpanawagan ni Senador Bong Go iti publiko nga ikararag ti nasayaat a salun-at ken kinatalged ni dati a Presidente Rodrigo Duterte iti baet ti maminsan manen a personal daytoy a simmango iti International Criminal Court (ICC).
Ginutigot ti Senador dagiti umili a bigbigen ti sakripisio ken kitaen dagiti naaramidan ti dati a lider ken inpettengna nga inaramid ti amin ni Duterte para iti masakbayan dagiti agtutubo iti uneg ti innem a tawen daytoy a panangidaulo.
Inaramid ni Go ti rakurak kagiddan ti panagatendar ni Duterte iti maikapat nga status conference iti The Hague, ti maikadua a personal daytoy a panagsango iti uneg ti dua a bulan tapno urnosen dagiti detalye ken panagsagsagana ti kaso.
Sumangsango ti dati a Presidente iti tallo a bilang ti crimes against humanity mainaig iti maipagarup a pannakairamanna iti saan a bumaba iti 76 a pammapatay manipud 2013 agingga 2018 iti baet ti kampaniana kontra iti droga.
Inkeddeng ti International Criminal Court ti panangrugi ti opisial a panangusig inton Nobiembre 30 a manamnama nga agpaut ti sumagmamano a bulan wenno tawen.
