LAOAG CITY – Inlawlawag ni Konsehal Jason Perera ditoy ciudad ti Laoag a no saan a maideklarar nga invalid ti maysa nga ordinansa ket otomatiko nga agbalin a valid.
Gapu iti daytoy, kunana a kasapulan nga agtignay iti naikeddeng a 30 nga aldaw dagiti maseknan nga opisyal ti gobierno tapno ideklarar nga invalid ti maysa nga ordinansa, kas maiyataday iti probisyon ti linteg.
Inbatad ni Atty. Perera a no lumabesen iti naikeddeng a panawen ken saan a naideklarar nga invalid ti maysa nga ordinansa, agbalin daytoy a valid.
Ti nagbalin a palawag ni Perera ket adda ti pakainaigan dagiti ordinansa ti barangay nga ad-adalen ti konseho, kas ti panagkolektar ken dagiti paggastosan ti gobierno lokal ditoy ciudad ti Laoag.
Nadakamat pay ni Perera a no ti maysa nga ordinansa ket addaan ti 20 a section ken maysa ditoy ti mapaneknekan a nalabsing na ti linteg, ti laeng nasao a paset na ti maideklarar kas invalid.
Nupay kasta, kuna na a mabalin a maapektaran ti pannakaipatungpal ti sibubukel nga ordinansa no saan nga ikkaten nga umuna ti paset na a naideklarar kas invalid.
Innayon na a no adda dagiti ordinansa wenno probisyon ti barangay a mailabsing iti linteg ket maisubli tapno maurnus a naimbag ken maikkat dagiti pasetna a nakakitaan ti problema.
Inrakurak ni Perera a no maurnus a naimbag ken masigurado nga awanen ti problema iti ordinansa ket mabalin manen nga isumitir ti barangay iti Sang Panlungsod ditoy ciudad ti Laoag.
