LAOAG CITY -Umabot iti 111,582 a pulis ti plano nga iwaras ti Philippine National Police (PNP) iti nagduduma a paset ti pagilian para Undas intono Nobyembre 1 ken 2, ad-ado no ikompara iti deployment iti napalabas a tawen.
Segun iti Department of the Interior and Local Government (DILG), papigsaen ti seguridad iti 5,628 a kamposanto ken columbaria, kasta met dagiti terminal ken dadduma pay a lugar a namnamaen a pagdudupudupan ti publiko.
Inbatad ni Police Colonel Amante Daro, acting executive officer ti PNP Directorate for Operations, a karaman iti deployment ti 11,782 a kameng manipod iti nagduduma a police units.
Makitinnulong pay ti 31,814 force multipliers, karaman ti Barangay Peacekeeping Action Teams, PNP advocacy support groups ken dagiti empleado ti gobierno iti panangpatalinaed ti kinaurnus ken pannakaiwanwan ti trapiko.
Malaksid kadagiti kamposanto, adda pay dagiti maiwaras a pulis iti bus terminals, transportation hubs, malls ken resorts.
Tutukan pay ti PNP ti panagpatrolya kadagiti residential area, partikular dagiti babbalay a panawan dagiti pamilya nga agbakasyon wenno agawid iti bukod da a probinsya tapno maliklikan ti pannakaserrek dagiti mannanakaw.
Immunan nga inbilin ni PNP Chief General Jose Melencio Nartatez Jr. kadagiti police unit nga ileppas da ti security plans, karaman ti panangikabil da ti police assistance desks, foot patrols ken emergency response teams kadagiti kamposanto.
Gagem ti mapaigetan a deployment a mapagtalinaed ti seguridad kabayatan a minilyon a Pilipino ti manamnama a mapan mangbisita kadagiti pimmusayen nga ipatpateg iti biag.
