LAOAG CITY – Inbasura ti International Criminal Court (ICC) Trial Chamber III ti kiddaw ti kampo ni dati a Presidente Rodrigo Duterte a limitaran laeng iti 10,000 items dagiti ebidensya a mabalin nga ipasango ti prosekusyon iti kaso na a crimes against humanity of murder.
Naiparuk-at ti nasao a desisyon iti baet ti maikapat nga status conference ti kaso a personal nga inatendaran ti dati a presidente iti The Hague.
Malaksid iti daytoy, inbasura pay ti korte ti kiddaw ti depensa a balbaliw nga isumitir ti prosekusyon dagiti ebidensya iti maysa a baro a case file iti Judicial Workflow Platform (JWP), ti opisyal a digital system nga us-usaren ti International Criminal Court iti panangimanihr dagiti rekord.
Segun kadagiti kaso nga inpila dagiti prosecutors ti International Criminal Court, sumangsango ni Duterte ti tallo a bilang ti crimes against humanity mainaig kadagiti maipagarop a panagpapatay ken gandat a panagpapatay iti pagilian sipud Nobyembre 2011 agingga iti Marso 2019 iti babaen ti kampanya na kontra iti illegal a droga.
