LAOAG CITY – Inpaganetget ti Malacañang ti kinapateg ti kinapudno ken panagsungbat kalpasan nga i-withdraw ti House prosecution panel ti tallo iti uppat nga impeachment articles kontra ken ni Vice President Sara Duterte.
Inbatad ni Palace Press Officer Claire Castro a saan a makibiang ti Palasyo iti istratehia ti prosecution panel iti panagsango ti kaso kontra iti Bise Presidente.
Kunana nga ad-adda nga ammo ti prosecution panel no ania kadagiti alegasion ti addaan ti nadagsen nga ebidensia a maidatag iti panangusig.
Naammoan a gapu iti panag-withdraw, alegasion ti unexplained wealth wenno saan a mailawlawag a kinabaknang ket isu laengen ti nabatbati a matalantan.
Karaman kadagiti naikkat nga alegasion ti saan nga umno a panagusar ti confidential funds, panagpasuksuk ken assassination plot.
Nupay kasta, kuna ni Castro nga agtalinaed iti kapanunotan ti publiko dagiti impormasion a nailanad iti impeachment proceedings.
