LAOAG CITY – Nagkedkedan ti International Criminal Court (ICC) Trial Chamber III ti panagkiddaw ti kampo ni dati a Presidente Rodrigo Duterte a limitaran laeng iti 10,000 nga items dagiti ebidensia a mabalin nga idatagt ti prosekusion iti kasona a crimes against humanity of murder.
Inparuk-at ti nasao a desision iti baet ti maikapat nga status conference ti kaso a personal nga inatendaran ti dati a Presidente iti The Hague.
Malaksid iti daytoy, nagkedkedan pay ti korte ti kiddaw ti depensa nga isubmitir manen ti prosekusion dagiti ebidensia iti maysa a baro a case file iti Judicial Workflow Platform (JWP), ti opisial a digital system nga us-usaren ti International Criminal Court iti panangimaton kadagiti rekord.
Basar kadagiti kaso nga inpila dagiti hues ti International Criminal Court, sumangsango ni Duterte iti tallo a bilang ti crimes against humanity maipagarup kadagiti maipagarup a pammapatay iti pagilian manipud Nobiembre 2011 agingga Marso 2019 iti babaen ti kampania kontra iti droga.
