LAOAG CITY – Inpasingked ni Jailwarden Edietor Guiang a nakasagana ti Ilocos Norte Provincilal Jail iti possible nga epekto ti “Super El Niño”.
Daytoy ket kalpasan a nagpalagip ni Governor Cecilia Araneta-Marcos kadagiti nagduduma nga ahensya ti gobierno para iti panagsagana iti nakaro a kinabara ti panawen.
Kuna na a binalakadan na dagiti balud para iti panagin-inot da ti danom, ken no adda man ti panagtudo na ket adda met dagiti nakasagana a balde a pagtayaan da.
Inbatad na pay a no nakaro unay ti kinabara ti panawen ket palubusan da dagiti balud a rumuar manipod iti selda da tapno agtalinaed da paylaeng iti sirok dagiti kayo wenno iti basketball court.
Innayon na a babaen iti daytoy ket maliklikan ti possible a panagpasar dagiti balud ti stroke ken dadduma pay a sakit a maala manipod iti nabara a panawen.
