Natay ti agarup 34 nga indibidual iti pannakarpuog ti maysa a pribado a pagadalan, a kaadoan kadagitoy ket agtawen ti saan a bumaba iti 13 iti Peshawar, Pakistan.
Segun ken ni Mohammad Asim, pannakangiwat ti Lady Reading Hospital, umabot met ti 19 a sabsabali dagiti nasugatan, ken sumagmamano kadagitoy ket adda ti kritikal a kondision.
Mainaig iti daytoy, kunana a nangiwayat ti sabali pay a search and rescue operation dagiti rescue workers iti narpuog a pasdek gapu ta patien da nga adda pay ti nabati a sumagmamano nga indibidual wenno ubbing a na-trap iti uneg.
Kabayatanna, inarestar dagiti pulis ti akinkukua ti pagadalan kabayatan ti agtultuloy nga imbestigasion iti kondision ken kinatibker iti pasdek.
Immuna iti daytoy, narigatan dagiti rescuers a nagturong iti pagadalan gapu iti naakikid a kalsada isut gapuna a saan da a dagus a nakapagresponde.
Mainaig daytoy, indanun ti opisina ni Pakistani President Asif Ali Zardari ti pannakipagladingit na iti napasamak
