Inpakaammo ni Laoag City Vice Mayor Rey Carlos Fariñas a manarimaan ti pannakakikoordinarna iti Sangguniang Kabataan Federated President pakaseknan iti premio dagiti agtutubo a nakipagpaset iti Linggo ng Kabataan nga aktibidad iti Sangguniang Kabataan.
Daytoy ti inbatadna kalpasan nga adda dagiti naipadanon kenkuana nga agpapan ita a gundaway ket saanda pay naawat dagiti premioda.
Inpakaammo na nga idi pay laeng bulan ti Agosto iti pannakaisayagkat iti aktibidad ken kunana a nabayag la unayen no aginnga ita ket saan pay naited dagiti premio.
Kunana nga nailatangan ti a nasayaat ti pondo dagiti aktibidad ket rumbeng a maipaay nga insigida ken awan met iti impormasion a panagkurkurang iti pondo iti city government.
Mainaig iti daytoy, immunan a naipadanon daytoy a reklamo ditoy Bombo Radyo Laoag manipud iti sumagmamano nga agtutubo a nakipagpaset iti nagduduma nga aktibidad iti Linggo ng Kabataan, pakairamanan iti Speech Choir competition ken nagduduma nga sports, ken naipadanon daytoy ken ni Sangguniang Kabataan Federated President Rionell Respicio.
Inpakaammona nga nabayagda nga ipagpagna dagiti papeles tapno mai-realese ti pondo ngem kunana a tunggal mapanda agisumitir dagiti papeles ket adda pay dagiti nayon a dokumento iti city treasurer office a masapul nga ipalpas.
Nupay kasta, inlawlawagda met kadagiti players ken coaches iti prosesoda ken mangnamnamada iti panang-awat dagiti maseknan .
Innayon pay ni Respicio a manipud idi Setiembre 28 agingga Oktubre 5 ket natengga manen dagiti dokumento gapu ta naka-official business iti sabali a probinsia ti city treasurer.
Kabayatanna, inpanamnamana a maipaay dagiti nadakamat a premio iti kabiitan a panawen.
