Inpakaammo ni Laoag City Vice Mayor Rey Carlos Fariñas a manarimaan ti pannakakikoordinarna iti Sangguniang Kabataan Federated President pakaseknan iti premio dagiti agtutubo a nakipapaset iti Linggo ng Kabataan nga aktibidad iti Sangguniang Kabataan.
Daytoy ti inbatadna kalpasan nga adda dagiti naipadanon kenkuana nga agpapan ita a gundaway ket saanda pay a naited ti premio dagiti nangabak iti aktibidad.
Inpakaammo na nga idi pay laeng bulan ti Agosto iti pannakaisayangkat iti aktibidad, ken kunana a nabayag la unayen no agingga ita ket saan pay a naited dagiti premio.
Kunana a nailatangan ti pondo dagiti aktibidad isut gapuna a rumbeng a maipaay nga insigida ken awan met iti impormasion a panagkurkurang iti pondo iti city government.
Immunan a naipadanon daytoy a reklamo ditoy Bombo Radyo Laoag manipud iti sumagmamano nga agtutubo a nakipapaset iti nagduduma nga aktibidad iti Linggo ng Kabataan, pakairamanan iti Speech Choir competition ken nagduduma nga sports, ken naipadanon pay daytoy ken ni Sangguniang Kabataan Federated President Rionell Respicio.
Inpakaammona a nabayag dan nga iprosproseso dagiti papeles tapno maiparuk-at ti pondo ngem kunana a tunggal mapanda agisumitir kadagiti papeles ket adda manen dagiti mainayon a dokumento iti city treasurer office a masapul a maileppas.
Innayon na a nailawlawagda metten kadagiti players ken coaches iti proseso da ken mangnamnama da a maipaayen ti premyo dagiti maseknan iti kabiitan a panawen.
Innayon pay ni Respicio a manipud idi Setiembre 28 agingga Oktubre 5 ket napending manen dagiti dokumento gapu ta naka-official business iti sabali a probinsia ti city treasurer.
Nupay kasta, inpanamnamana a maipaay dagiti nadakamat a premio iti kabiitan a panawen.
