LAOAG CITY – Naipaiman ti National Irrigation Administration – Region I dagiti Solar Water Pump iti tallo a barangay iti ili ti Piddig.
Nagturong a mismo ni Engr. Jeffrey Catulin, Director ti National Irrigation Administration – Region I ditoy probinsya tapno imatangan na ti pannakaibunong dagiti solar water pump.
Kuna na nga umabot iti 15 nga ektarya ti kabaelan a padanuman ti nasao a solar water pump.
Inrakurak ni Catulin a ti panagibunong da ti solar water pump ket paset ti panagsagsagana iti possible nga epekto ti “Super El Niño” gapu ta ti kangrunaan a kasapulan dagiti mannalon ket ti danom.
Malaksid ken ni Catulin ket adda pay ni Ilocos Norte 1st District Representative Sandro Marcos iti pannakaibunong dagiti water pump iti ili ti Piddig.
Inbatad na nga iti panagsursur da tapno amwen ti kasapulan dagiti mannalon ket maysa kadagiti kangrunaan a dinakamat da ket ti water pump.
Mangnamnama ti kongresista a dakkel a makatulong dagiti water pump a naibunong kadagiti mannalon iti nadakamat a lugar.
