LAOAG CITY – Nagpanawagan ti Department of Foreign Affairs (DFA) ti pananglapped iti panagsao ken diplomasia kalpasan ti rakurak ni Chinese Ambassador to the Philippines Jing Quan a maibilang a saan a direkta a pangta ti panagusar ti puersa.
Segun iti ahensia, saan a makatulong ti kastoy a panagsasao iti panangpatalinaed ti talek ken naurnos a relasion ti Pilipinas ken China.
Ginutigotna pay dagiti amin a taga-sabali a pagilian a diplomat nga agbalin a naan-annad kadagiti rakurakda iti publiko.
Immunan iti daytoy ti inrakurak ni Jin nga alisto a mangabak ti China no agusar daytoy ti puersa ngem inpettengna a saan daytoy nga aramiden ti Beijing gapu ta kalikagumna a mapagtalinaed ti kinakappia iti rehion.
Malaksid iti daytoy, kwinestionaranna pay dagiti babalaw a ti China ti “Troublemaker” iti Southeast Asia.
Kabayatanna, nagsinnungbat dagiti opisial ti Pilipinas ken China kalpasan a kinontra ni Defense Secretary Gilberto “Gibo” Teodoro jr. ti panangiladawan ni Vice President Sara Duterte iti Pilipinas kas “Troublemaker” ng rehion.
Inpaganetget ni Teodoro nga isalsalaknibna laeng ti pagilian, dagiti karbenganna iti West Philippine Sea.
Nupay kasta, inbatad ni Jing ti namnama a malpasen ti negosasion iti code of conduct iti West Philippine Sea a gagemna a mangikeddeng dagiti pagannurotan para kadagiti pagilian nga agtagikua iti nadakamat a kabaybayan.
